Merkisdagar – Heimilisvefurinn

Hugmyndir fyrir sumardaginn fyrsta

Leave a Comment / Fjölskyldan, hátíðir, Merkisdagar

Hugmyndir fyrir sumardaginn fyrsta

Það styttist í sumarið, eða a.m.k. sumardaginn fyrsta. Sumardagurinn fyrsti er fyrsti fimmtudagur eftir 18. apríl ár hvert og er fyrsti dagur Hörpu. Harpa er því fyrstur af sex sumarmánuðum í gamla norræna tímatalinu.

Íslensk þjóðtrú segir að ef sumar og vetur frjósi saman boði það gott sumar. Það þýðir að ef hiti fer niður fyrir frostmark aðfararnótt sumardagsins fyrsta á sumarið að verða gott.

Hefðir á sumardaginn fyrsta

Haldið hefur verið upp á sumardaginn fyrsta á Íslandi í margar aldir og var hann lengi talinn fyrsti dagur ársins. Nokkrar hefðir hafa tengst þessum degi í gegnum aldirnar:

Fyrsti dagur sumars var frídagur frá vinnu og börn fengu að fara á milli bæja til að leika sér við önnur börn. Þess vegna er dagurinn oft sagður vera dagur barnanna og Reykjavíkurborg heldur barnamenningarhátíð í kringum þennan dag.
Þessi dagur var einnig helgaður ungum stúlkum áður fyrr og nefndur yngismeyjadagur. Strákar máttu þá gefa í skyn hverja þeim leist á. Dagurinn er því sambærilegur við bóndadaginn og konudaginn á fyrsta degi þorra og góu.
Matarveisla var haldin þennan dag og í dag halda margir grillveislu þennan dag. Ekki er vitlaust að bjóða upp á góðan eftirrétt eða hafa eitthvað með kaffinu.
Vitað er til þess að sumargjafir hafi verið gefnar að minnsta kosti fjórum öldum áður en jólagjafir fóru að tíðkast. Sá siður hefur haldist og enn í dag fá flest íslensk börn sumargjafir þennan dag.

Hugmyndir að sumargjöfum

Á sumardaginn fyrsta er oft farið að hlýna aðeins í veðri en þó er oftast nokkuð svalt ennþá. Sumargjafir eru oftast gjafir sem eiga að nýtast til leikja á sumarmánuðunum þegar hlýrra er í veðri og kosta yfirleitt ekki mikið. Hér eru nokkrar hugmyndir að sumargjöfum fyrir káta krakka:

Þessar klassísku:

Krítar
Sápukúlur
Vatnsblöðrur (hægt að fá fjölnota)
Vatnsbyssur
Flugdreki
Sandleikföng (skófla, fata o.fl.)

Boltar

Fótbolti
Körfubolti
Brennibolti
Skopparabolti

Tengt hreyfingu:

Trampólín
Hjól
Hlaupahjól
Hjóla- eða línuskautar
Hjólabretti
Hjálmur
Sultur
Húllahringur
Sippuband/snúsnúband
Frisbídiskur
Uppblásin sundlaug eða annað vatnsleikjadót
Fótboltamark
Badmintonspaðar
Minigolf
Útileikir/spil (krokkett og kubb)

Annað:

Gjafabréf (t.d. í ísbúð eða í húsdýragarð)
Hátalari eða útvarp
Jójó
Ísform
Hengirúm
Fræ

Gjafir tengdar sundi:

Sundföt
Kútar
Froskalappir
Sunddýna
Sundhringur
Sundbolti
Sundgleraugu

Fatnaður:

Jakki
Sumarkjóll
Stuttbuxur
Derhúfa
Sólgleraugu
Strigaskór

Fyrir ævintýri sumarsins:

Bakpoki
Vatnsbrúsi
Ferðataska
Tjald
Útilegustóll
Háfur
Veiðistöng

Fyrir dundarann:

Bók
Krossgátur
Þrautabók
Sudoku
Spil
Málning
Litir
Blómapressa
Smásjá
Dagbók

Hugmyndir fyrir sumardaginn fyrsta Read More »

Sólarkaffi

Leave a Comment / Fjölskyldan, hátíðir, kökur, Matur, Merkisdagar, samvera, uppskriftir

Sólarkaffi

Sólarkaffi er hefð sem upprunalega varð til á Ísafirði og er enn mjög stór hefð þar, en hefur svo einnig dreift sér víðar um landið. Einkum til staða þar sem fjöllin eru það há að sólin hverfi á bak við þau í svartasta skammdeginu. Þegar aftur fer að sjást til sólar, sem er oft seint í janúar, er haldið upp á það með sólarkaffi til að fagna hækkandi sól. Á sólarkaffinu eru borðaðar sólarpönnukökur, sem bragðast mun betur en aðrar pönnukökur.

Sama hvort fólk býr undir bröttum fjallshlíðum eða á víðáttumikilli sléttu geta allir tekið þátt í sólarkaffihefðinni og fagnað því að dagurinn sé nú orðinn töluvert lengri en hann var fyrir um mánuði síðan. Það eina sem þarf er góð pönnukökupanna og hráefni í pönnukökur. Það er vitaskuld enn betra að bjóða góðu fólki að bragða á pönnukökunum með sér. Þetta er fín ástæða til að halda upp á eitthvað í janúar (þó vissulega séu þorrablótin um þetta leyti líka) og lífga upp á tilveruna. En samkvæmt því sem bresk ferðaskriftstofa komst að fyrir um tuttugu árum er þriðji mánudagurinn í janúar versti dagur ársins og dagurinn hefur verið nefndur “blár mánudagur” (e. Blue Monday). Er ekki tilvalið að breyta því og kætast yfir gómsætum pönnukökum? Hér er allavega uppskrift að sólarpönnukökum fyrir áhugasama.

Sólarpönnukökur

50 g brætt smjör

4 dl hveiti

½ tsk matarsódi

1 tsk lyftiduft

½ tsk salt

2 egg

2 tsk vanilludropar eða aðrir dropar

Mjólk eins og þarf

Aðferð:

Bræðið smjörið á pönnukökupönnunni og leyfið því svo að kólna aðeins.
Setjið hveiti, matarsóda, lyftiduft, salt, egg og vanilludropa í stóra skál. Það má einnig prófa sig áfram með t.d. sítrónudropa eða möndludropa ef maður er í stuði.
Hellið smjörinu út í þegar það hefur kólnað aðeins.
Bætið við mjólk og hrærið öllu saman, bætið svo við meiri mjólk þar til deigið verður mjög þunnt.
Hitið pönnukökupönnuna aftur og hafið hana miðlungs heita.
Hellið deigi á pönnuna og dreifið úr því með réttum handtökum. Pönnukakan á að sjálfsögðu að vera mjög þunn.
Steikið pönnukökuna þar til hún er orðin gullinbrún undir og snúið henni þá við og steikið hinum megin. Munið að fyrsta pönnukakan er alltaf skrýtin.
Berið fram eins og ykkur lystir, upprúlluð með sykri eða með sultu og rjóma. Það má einnig prófa sig áfram með alls kyns fyllingum. Hægt væri að prófa t.d. nutella eða súkkulaðisósu, hnetusmjör, ávexti, karamellusósu eða lemon curd.

Sólarkaffi Read More »

Gleðileg jól!

Heimilisvefurinn óskar lesendum sínum og landsmönnum öllum gleðilegra jóla og farsæls komandi nýs árs. Vefurinn þakkar fyrir góða viðtökur á árinu. Við bjuggumst ekki við því að geta náð til svo margra eins og raun ber vitni en í kringum hundrað manns kíkja á síðuna á hverjum degi, þrátt fyrir að síðan sé ekkert auglýst.

En sem jólagjöf til fjölskyldna þessi jólin hefur Heimilisvefurinn bætt við litamyndasíðu sem hægt er að finna hér. Þar er hægt að finna átta jólalitamyndir til að lita yfir hátíðirnar.

Gleðileg jól! Read More »

Bestu jólamyndirnar

Leave a Comment / Fjölskyldan, hátíðir, Jól, kósýkvöld, Merkisdagar, samvera

Bestu jólamyndirnar

Eitt af því sem við tengjum flest við jólin eru jólamyndirnar. Flest eigum við okkar uppáhalds jólamynd sem er ómissandi hluti af jólahátíðinni. Sum verða að horfa á allar Harry Potter-myndirnar yfir jólin, önnur mega ekki sleppa því að horfa á Christmas Vacation fyrir jól og enn önnur myndu segja að það kæmu engin jól án þess að horfa á Home Alone. En sama hver við teljum að sé besta jólamynd allra tíma er vel hægt að bæta við nokkrum nýjum í safnið. Í gegnum árin hafa verið gefnar út ótal margar jólamyndir og margar þeirra eru… vægast sagt hræðilegar, en inn á milli leynast gullmolar. Heimilisvefurinn hefur tekið saman nokkrar af ástsælustu jólamyndum allra tíma (sumar falla þó inn í „elska að hata“-flokkinn) og þær sem fá ágætis einkunnir á IMDB. Allar myndirnar á listanum eru með yfir 5,5 í einkunn á síðunni. Listinn er settur upp sem áskorun um að horfa á allar myndirnar og gefa þeim einkunn. Alls eru 60 bíómyndir á listanum (og því er um að gera að byrja sem fyrst til að ná að klára fyrir áramót.) Bíómyndirnar eru fjölbreyttar, allt frá væmnum rómantískum gamanmyndum og barnamyndum yfir í hrollvekjur og mynd um fyrri heimstyrjöldina.

Góða skemmtun!

Bestu jólamyndirnar Read More »

Hugmyndir að skógjöfum

Leave a Comment / börn, hátíðir, Jól, Merkisdagar

Hugmyndir að skógjöfum

Það getur verið yfirþyrmandi verkefni fyrir sum að reyna að finna þrettán skógjafir fyrir desembermánuð, og þá tala ég nú ekki um ef börnin eru fleiri og finna þarf kannski 26, 39 eða 52 skógjafir! Auðvitað er oft hægt að gefa börnunum svipað eða það sama í skóinn frá sumum eða flestum jólasveinunum. Svo vill maður heldur ekki sitja uppi með fullt af litlu dóti og drasli sem krakkarnir léku sér með í fimm mínútur og svo aldrei meir. Eins þarf að passa að sveinki gefi ekki of stórar og dýrar gjafir því börn bera sig mikið saman við önnur börn og það getur verið sárt að fá mun minna en aðrir í skóinn. Áður en farið er út í að kaupa skógjafirnar er gott að pæla aðeins í því hvað krökkunum raunverulega vantar. Jólasveinarnir gætu nefnilega reddað því.

Hér eru nokkrar hugmyndir að skógjöfum sem vonandi nýtast betur en eru jafnframt ódýrar og ættu ekki að særa önnur börn:

1. Eitthvað bragðgott

Börnunum finnst æðislegt að fá eitthvað bragðgott í skóinn og yfirleitt hverfur það á nokkrum mínútum. Þetta getur verið t.d. nammi, ávaxtanammi, rúsínur, mandarína, smákökur eða eitthvað slíkt.

2. Heitt kakó

Annað sem börnunum finnst æðislegt og safnar ekki ryki upp á hillu er heitt kakó. Hægt er að kaupa t.d. Swiss Miss í pokum eða súkkulaðibombur sem settar eru út í heitt vatn eða mjólk.

3. Lego, duplo eða playmo

Að sjálfsögðu á ekki að kaupa stóru dýru settin. Betra er að geyma þau fyrir jólapakkana. Vissulega er hægt að kaupa einn stóran pakka og skipta honum í nokkrar minni gjafir eða að kaupa minnstu pakkana og gefa í skóinn. Einnig er stundum hægt að finna lego, duplo og playmo á flóamörkuðum.

4. Þroskaleikföng

Fyrir allra yngstu börnin (sem eiga eldri systkini sem fá í skóinn) er hægt að gefa þroskaleikföng, naghringi, hristur eða fleira slíkt.

5. Baðbomba eða freyðibað

Baðbombur eru skemmtilegar fyrir allan aldur (a.m.k. ef það er til baðkar á heimilinu).

6. Naglalakk

7. Krem eða maskar

Ef barnið hefur áhuga á kremum og möskum verður þetta líklegast notað fljótt.

8. Kerti

Eitthvað fallegt jólakerti eða gott ilmkerti er gaman að fá í skóinn fyrir krakka í eldri kantinum (ef þau hafa áhuga á slíku).

9. Snyrtivörur

Snyrtivörur eru ágætis skógjafir fyrir unglinga. Passið samt að hafa þær ekki dýrar.

10. Pennar og blýantar

Það er alltaf gaman að fá nýjan og skemmtilegan penna eða blýant í pennaveskið.

11. Litir

Trélitir, tússlitir, vaxlitir, klessulitir… alls konar litir til að búa til fallegar myndir.

12. Andlitsmálning

Flestum börnum finnst ótrúlega skemmtilegt að láta mála á sér andlitið og fá að vera eitthvað annað en þau eru, t.d. ljón eða prinsessa.

13. Bolli, glas, peli eða stútkanna

Gott og gagnlegt að eiga á hverju heimili.

14. Sokkar eða sokkabuxur

Það þurfa allir að eiga sokka eða sokkabuxur.

15. Lyklakippa

Gaman er að fá flotta lyklakippu fyrir lyklana.

16. Veski eða budda

Vesti fyrir kortin eða budda fyrir klinkið.

17. Gjafabréf

Séu gjafabréfin ekki of dýr er hægt að gefa slíkt í skóinn. Þetta geta t.d. verið gjafabréf í ís, bíó eða annað slíkt. Einnig má búa til heimatilbúin gjafabréf sem gilda t.d. til að fá að velja hvað er í matinn eða að velja bíómynd fyrir næsta kósýkvöld.

18. Teygjur og spennur

Börn með sítt hár þurfa oft nýjar teygjur eða spennur.

19. Popp

Einn popppoki í örbylgjuofninn og málið er dautt.

20. Tyggjó

Tyggjópakki er mjög spennandi fyrir börnum á ákveðnum aldri sem fá kannski ekki oft tyggjó.

21. Skrúbbur

Hentar vel í skógjöf fyrir unglinga.

22. Leir

Það er ofsalega gaman og mikil núvitund í því að leira.

23. Límmiðar og límmiðabók

Að safna límmiðum í límmiðabók var mikið sport í mínu ungdæmi.

24. Vatnslitir, málning eða fingramálning

Fer eftir aldri og áhuga en allt er þetta mjög góð og skemmtileg afþreying.

25. Spil

Hér verður að passa sig að hafa spilin ekki of dýr eða „flott“. Það er eitt að fá fallegan spilastokk í skóinn og annað að fá Ticket to Ride eða álíka spil. Ferðaútgáfur af spilum gætu hentað, eða klassísk og einföld spil eins og slönguspilið, minnisspil, lúdó og slíkt.

26. Jólaskraut

Það er gaman fyrir krakkana að jólaskraut í herbergið eða jólakúlu til að hengja á jólatréð.

27. Bók

Hér þarf aftur að passa að hafa bókina ekki of dýra. Litlar bækur eins og litlu smábarnabækurnar eru tilvaldar í skóinn.

28. Bangsi

Lítill krúttlegu bangsi í skóinn fyrir þessi yngstu er góð gjöf.

29. Fótboltamyndir eða pókemonspil

Fyrir þau börn sem eru að safna slíkum myndum er þetta fyrirtaks gjöf.

30. Púsl

Lítið púsluspil í skóinn er frábær gjöf.

31. Perlur

Einn poki af perlum eða nýtt perluspjald fyrir börn sem hafa gaman af því að perla. Einnig er hægt að prenta út perl-„uppskriftir“ á netinu.

32. Litamynd eða litabók

Litabók eða vel valin litamynd er tilvalin skógjöf.

33. Stílabók, teikniblokk eða dagbók

Þá geta krakkarnir skrifað sögur, teiknað myndir eða skrifað í dagbók.

34. Húfur og vettlingar

Eitthvað hlýtt til að leika sér í snjónum.

35. Náttföt

Sígild gjöf frá síðasta jólasveininum, Kertasníki.

36. Handavinna

Skemmtileg handavinna getur stytt biða eftir jólnunum. Hægt er að gefa krökkunum litla útsaumsmynd, garn og prjóna eða annað slíkt.

37. Smákökuuppskrift og hráefni (eða tilbúið deig)

38. Þrautabók eða krossgátubók

39. Tannbursti

40. Morgunverður

Eitthvað sem barnið getur borðaði í morgunmat, t.d. jólajógúrt, lítill morgunkornspakki eða annað slíkt.

Fyrir þessi allra yngstu

Fyrir þessi allra yngstu, undir tveggja ára aldurinn, er hægt að kaupa eitthvað sem vantar. Slefsmekkur, nagdót, samfella, bleyjur, snuð, skvísur/barnamatur og fleira í þeim dúr er sniðugt að nýta sem skógjafir fyrir þau. Þau bera sig að sjálfsögðu ekki saman við önnur börn svo óhætt er að gefa ýmislegt dýrara ef þarf og ef eldri systkini fatta ekki að þetta sé „stærri“ gjöf.

Hugmyndir að skógjöfum Read More »

70 hugmyndir fyrir samverudagatal

Leave a Comment / Fjölskyldan, hátíðir, Merkisdagar, samvera

70 hugmyndir fyrir samverudagatal

Margar fjölskyldur eru farnar að hafa samverudagatal í desember til að eiga góðar stundir saman á meðan beðið er eftir jólunum. Það er ýmislegt hægt að gera og margt kostar lítið sem ekki neitt. Mikilvægt er að hafa þetta ekki of flókið, það þarf ekki vera full dagskrá alla daga, nóg annað er að gera á þessum tíma. Hér eru nokkrar hugmyndir að samverustundum fyrir fjölskyldur sem hægt er að gera nánast hvar sem maður er á landinu.

Hlusta saman á jólasögu.
Hitta jólasvein.
Fá lánaða jólabók á bókasafninu.
Höggva niður jólatré eða velja það á næsta sölustað.
Fara í jólasunnudagaskóla.
Kaupa eða búa til eitthvað jólaskraut á jólatréð.
Sjá þegar jólatré bæjarins er tendrað.
Fara í jólagöngutúr með heitt kakó í brúsa.
Fara á kaffihús og fá ykkur heitt súkkulaði.
Fara í jólaljósbíltúr (á náttfötunum).
Skrifa jólakort.
Fara á jólasýningu.
Renna á sleða eða snjósleða.
Skrifa bréf til jólasveinsins.
Syngja jólalög.
Fara á skíði.
Fara á jólatónleika.
Skreyta fyrir jólin.
Skoða gamlar fjölskyldumyndir og myndbönd og rifja upp gamla og góða tíma.
Kynnið ykkur hvernig jólin eru haldin í örðu landi.
Baka smákökur.
Hafa jólasögustund við jólatréð.
Baka piparkökur.
Búa til piparkökuhús.
Leysa jólaþrautir (t.d. orðasúpu með jólaþema).
Fara á skauta.
Búa til fuglamat og gefa fuglunum.
Búa til jólakrans.
Fara í göngutúr og skoða jólaljósin
Baka smákökur og gefa í frísskáp/þeim sem minna mega sín
Taka til leikföng sem eru ekki lengur notuð og gefa í gott málefni
Horfa á jólamynd
Horfa saman á jóladagatal sjónvarpsins
Kveikja á aðventukransinum
Föndra jólaskraut
Klippa út snjókorn og hengja í gluggann
Búa til ykkar eiginn gjafapappír
Pakka inn jólagjöfum
Lita jólalitamynd
Föndra merkimiða á jólagjafirnar
Gefa mat í frískáp
Búa til og fara í jólaratleik
Jólabingó!
Búa til músastiga
Perla eitthvað jólalegt
Sauma út jólamynd
Fara í heimsókn
Búa til jólaskraut úr trölladeigi eða leir
Búa til snjókarl
Búa til jólakahoot
Læra að segja „gleðileg jól“ á öðrum tungumálum
Búa til jólakonfekt
Spila saman
Púsla saman
Fara á jólamarkað
Búa til (barnvænt) jólaglögg
Vera í ljótum jólapeysum
Fara í rautt freyðibað
Ákveða saman hvað á að vera í jólamatinn
Búa til heimatilbúnar gjafir
Hafa jólabröns
Skreyta gluggana með gluggapennum
Skera út laufabrauð
Baka lagköku
Baka jólasmákökur frá öðru landi
Dansa við jólalög
Setja negulnagla í mandarínur eða appelsínur
Jólalautarferð á gólfinu í stofunni
Taka jólamynd af fjölskyldunni
Smákökusamkeppni fjölskyldunnar

70 hugmyndir fyrir samverudagatal Read More »

Einfaldir og fljótlegir búningar fyrir Hrekkjavökuna

Leave a Comment / hátíðir, Merkisdagar

Einfaldir og fljótlegir hrekkjavökubúningar

Það styttist í Hrekkjavökuna. Sum okkar eru farin að halda upp á þennan dag, oft fyrir börnin en mörgum þykir gaman að fara alla leið með skreytingar og búninga. Í kringum þennan árstíma getur maður þurft að mæta í búningi eitthvert, t.d. í búningapartý eða jafnvel í vinnuna. Fólk hefur mismikinn áhuga og tíma til að finna sér búning. Enn aðrir eru ekki tilbúnir til að kaupa búning eða hafa ekki efni á slíku. Hér er því listi af búningnum sem eru einfaldir og þarfnast ekki mjög mikillar fyrirhafnar, en eru fyrst og fremst ekki keyptir nýir (þeir eru alltaf svo lélegir). Búningarnir ganga líka allir fyrir öskudaginn og eru ekkert endilega allir neitt hræðilegir eða hrekkjavökulegir. Ef maður vill hafa búningana hrekkjavökulegri er einfaldlega hægt að bæta við gerviblóði eða marblettum (með augnskugga) við búningana.

Draugur

Einfaldur og sígildur búningur. Hvítt lak og skæri er allt sem þarf!

Túristi

Þetta er annar mjög einfaldur búningur sem er mjög líklega til í fataskápnum hjá þér. Það sem þarf er t.d. stuttbuxur, stuttermabolur eða hawaískyrta, sandalar (og sokkar), sólgleraugu, sólhattur eða derhúfa, selfiestöng/myndavél, ferðabæklingar, bakpoki o.fl. í þeim dúr. Eitthvað sem (hallærislegur) túristi í sólarlandaferð myndi klæðast eða hafa með sér. Til þess að gera búninginn extra flottann er gott að setja vel af sólarpúðri og kinnalit í andlitið til að virðast útitekinn og hálfbrunninn í framan.

Rokkstjarna

Annar búningur sem hægt er að búa til úr því sem er til í fataskápnum nú þegar (eða auðveldlega hægt að fá lánað). Það sem þarf er t.d. svört eða dökk föt, leðurjakki eða gallajakki, úfið hár, dökkur augnfarði og hugsanlega svart naglalakk, gervitattú og svartur varalitur. Til að gera búninginn enn betri væri hægt að hafa hljóðnema eða gítar með. Hægt er að búa til einfaldan hljóðnema með því að setja álpappír utan um písk.

Amma/afi

Það er mjög auðvelt að þykjast vera gamalt fólk. Best væri ef hægt væri að spreyja hárið grátt/hvítt en það er þó ekki nauðsynlegt. Ömmur geta klætt sig í (ýkt) ömmuleg föt, t.d. kjól og svuntu, verið með staf, gleraugu og sjal. Þær geta einnig haft með sér kökukrús með smákökum til að bjóða upp á. Við erum að vinna með stereotýpur hérna. Afar þurfa staf, axlarbönd, gleraugu og prjónavesti.

Hippi

Nú þegar útvíðar buxur eru komnar aftur í tísku er mjög auðvelt að klæða sig sem hippa. Það sem þarf eru útvíðar buxur, stuttermabolur með orðinu „peace“ eða peace-merkinu eða annar hippalegur efri partur, slegið og helst sítt hár, hárband og mögulega hálsmen með peace-merkinu. Svo væri hægt að mála blóm á aðra kinnina og passa að mynda peace-merki með puttunum allan daginn.

Barbie, Ken og Elle Woods

Barbiemyndin var vinsæl í sumar og mörg klæddu sig upp eins og Barbie fyrir bíósýningar og það er vel hægt að endurnýta þann búning á Hrekkjavökunni. Bleikur klæðnaður og farði. Það er ekki flóknara en það. Einnig er hægt að segjast vera Elle Woods úr Legally Blonde en þá mætti bæta við hundabangsa.

Strákar, þið getið auðvitað verið Ken.

Kokkur

Til að búa til kokkabúning þyrfti hvít eða svört föt og svuntu og svo væri hægt að vera annað hvort með kokkahatt eða einfaldlega hárnet. Hægt er svo að halda á píski eða sleif. Það þarf ekki að vera flóknara en það.

Mary Poppins

Annar búningur sem gæti verið til í fataskápnum er Mary Poppins. Það sem þarf er dökkt millisítt pils, dökkur blazer, hvít skyrta, rauð slaufa/borði eða trefill, svartur skór, hattur og hægt er að föndra blóm á hann, regnhlíf og síðast en ekki síst góð taska.

Supercalifragilisticexpialidocious!

Mótmælandi

Mótmælandi getur nokkurn veginn klæðst hverju sem er. Gallabuxur og bolur henta t.d. mjög vel. Síðan þarf bara að útbúa spjald með mótmælaorðum.

Klikkuð kattakona eða karl (Crazy cat lady)

Ef þú átt til kattabanga, helst nokkra, er ekkert mál að skella í svona búning. Þú þarft, auk bangsanna, skrýtinn klæðnað eða slopp. Klæðnaðurinn getur verið alls konar.

Einfaldir og fljótlegir búningar fyrir Hrekkjavökuna Read More »

Hefðir fyrir fyrsta skóladaginn

Leave a Comment / börn, Fjölskyldan, hátíðir, Merkisdagar

Hefðir fyrir fyrsta skóladaginn

Senn líður að því að skólarnir fari að byrja aftur, leikskólarnir eru þó reyndar flestir byrjaðir aftur. Mörg börn bíða spennt eftir að byrja í skólanum, kannski mest þau sem eru að byrja í 1. bekk, en þessi eldri mörg hver líka. Það er gaman að hitta alla vinina aftur og eignast kannski nýja. Önnur eru ekki eins spennt og margar ástæður geta legið þar að baki. En hvort sem barnið þitt er spennt eða ekki eru hér nokkrar hefðir (því hefðir eru jú svo mikilvægar LINKUR) sem tengjast skólabyrjun. Hefðirnar gætu einnig hjálpað sumum af ofurspenntu að stytta biðina eða kvíðnu börnunum við að byrja í skóla. Ef ykkur langar til að taka upp einhverjar af þessum hefðum er það bara frábært, en það er engin pressa – þið gerið bara það sem er best fyrir fjölskylduna ykkar.

Áður en skólinn byrjar

Niðurtalning að skólabyrjun

Hægt er að byrja mánuði fyrir skólasetningu eða t.d. tíu dögum fyrr. Hægt er að krossa yfir daga á dagatali eða búa til eins konar tíu daga “jóladagatal” með smá gjöfum sem er gott að eiga þegar skólinn byrjar, t.d. blýantar, litir og strokleður.

Skólaföt

Það er hefð hjá mörgum að kaupa sérstök föt fyrir skólann. Þetta eru auðvitað bara venjuleg hversdagsföt en þau eru keypt sérstaklega svo börnin séu í nýjum og fínum fötum fyrsta skóladaginn.

Skólaálfurinn Skólína

Skólaálfurinn Skólína getur hjálpað kvíðnum börnum við að byrja í skólanum en hún líka einfaldlega skemmtileg hefð fyrir alla. Skólína sendir börnunum bréf við skólabyrjun og oft fylgir lítil gjöf með sem tengist skólanum eða föndri. Skólína sendir smá töfraduft með í umslaginu, það mætti líka vera töfradrykkur í flösku. Ef barnið notar duftið eða drekkur töfradrykkinn getur Skólína komið með í skólann til að passa upp á barnið. Þetta útskýrir hún sjálf í bréfinu. Hún útskýrir líka að þetta sé algjört leyndarmál sem má ekki segja neinum nema foreldrum því annars hætta töfrarnir að virka. Skólína er ósýnileg en hún er alltaf til staðar í skólabyrjun. Börn geta líka skrifað Skólínu og beðið hana um að koma og hjálpa sér með að byrja aftur í skólanum næsta ár. Skólína svarar þá alltaf með bréfi og minnir á hvað það var gaman í skólanum árið áður. Góð regla er að bréfin frá Skólínu komi tveimur dögum fyrir skólasetningu. Þessa hugmynd getur hver fjölskylda þróað áfram sjálf.

Viðtal

Áður en skólinn byrjar er gaman að taka viðtal við börnin og spyrja þau út í væntingar sínar og markmið fyrir árið eða annað sem ykkur dettur í hug. Þetta er þá skrifað niður og geymt í möppu eða á öðrum góðum stað.

Skólaskemmtun

Nei, ekki skemmtun á vegum skólans heldur lítið partý heima áður en skólinn byrjar til að fagna nýju skólaári. Hægt er að fara í leiki og dansa.

Lesa sögur um skólann

Á hverju kvöldi áður en skólinn byrjar aftur er hægt að lesa skólatengdar sögur fyrir svefninn. Alls konar bækur má finna á bókasöfnum landsins um skólann t.d. Asnaskólann, Skóladraugurinn, Skólaráðráðgátuna, Langelstur í bekknum og bækur úr bókaflokknum Bekkurinn minn.

Kaupa skólavörur saman

Í dag eru reyndar margir skólar farnir að bjóða upp á flest skriffæri og stílabækur ókeypis í skólanum en þrátt fyrir það þarf stundum að kaupa nýja skólatösku, pennaveski, nestisbox, brúsa og sundpoka sem dæmi. Það getur verið skemmtileg hefð að kaupa það sem vantar saman. Stundum er líka hægt að kaupa einhverja skemmtilega liti eða penna fyrir skólann, sem þau myndu annars ekki fá þar.

Skólaföndur

Fyrir föndrarana og krakkana sem elska að dunda sér er fullkomin hefð að föndra eitthvað skólatengt áður en skólinn byrjar. Hægt er að finna gríðarlega margar hugmyndir á pinterest.

Fyrsta skóladaginn

Skólabolur

Fyrsta skóladaginn væri það skemmtileg hefð að skreyta bol og skrifa á hann t.d. “Fyrsti skóladagurinn 2023”. Í myndatökunni er barnið svo í bolnum. Þegar barnið útskrifast svo úr grunnskóla á það vonandi alla bolina ennþá.

Önnur hugmynd að skólabol væri að kaupa bara einn bol í fullorðins stærð og bæta við handarfari barnsins fyrsta dag hvers skólaárs, út alla skólagönguna.

Morgunverður

Önnur skemmtileg hefð fyrir fyrsta skóladaginn er að búa til flottan morgunverð. Eitthvað sem er kannski í uppáhaldi hjá krökkunum, t.d. pönnukökur, egg og beikon. Skólasetningar eru yfirleitt í kringum 9 eða 10 og því ætti að vera tími í flottari morgunverð þennan morguninn.

Mynd

Sennilega er þetta auðveldasta og augljósasta hefðin en líka ein sú skemmtilegasta, að taka mynd af barninu með skólatöskuna, tilbúið til að fara í skólann. Í framtíðinni verður svo gaman að skoða allar myndirnar saman.

Myndband

Það gæti líka verið gaman að taka smá myndband af barninu fyrsta skóladaginn. Spyrja það kannski aðeins út í skólann og hvernig því líður. Seinna verður þá hægt að klippa saman öll myndböndin og búa til eitt lengra.

Snarl eftir skóla

Fyrir B-týpurnar þarna úti sem ekki gátu bakað pönnukökur um morguninn er hér kannski betri hefð fyrir ykkur. Að fara með krakkana í bakarí eftir skólasetningu og fá ykkur eitthvað gott að borða saman.

Aðrar skólatengdar hefðir

Skólaminningabók

Hægt er að búa til skólaminningabók eða möppu og í hana er hægt að safna myndum frá skólanum, sögum, listaverkum, handarförum og fleiru. Hægt er að skrifa niður það helsta sem barninu finnst skemmtilegt í skólanum, hverjir vinir þess séu og fleira í þeim dúr.

Tímahylki

Ekki að þetta þurfi að vera eitthvað hylki. Þetta getur líka bara verið kassi eða box sem þið geymið allar skólaminningarnar í, myndir og bestu verkefnin. Gaman er að skoða tímahylkið árlega.

Vonandi nýtast þessar hugmyndir ykkur við að búa til ykkar eigin hefðir í skólabyrjun!

Hefðir fyrir fyrsta skóladaginn Read More »

Afmæli Jóns Árnasonar

Leave a Comment / börn, hátíðir, Merkisdagar

Afmæli Jóns Árnasonar

Þann 17. ágúst nk. eru 204 ár frá fæðingu Jóns Árnasonar. Hver er Jón Árnason eiginlega, spyrja sum sig kannski. Í mjög stuttu máli er Jón Árnason maðurinn sem safnaði saman íslenskum þjóðsögum og ævintýrum. Hann er eins konar Grimm-bróðir Íslendinga, enda varð hann fyrir áhrifum frá bræðrunum þýsku. Hér verður farið yfir ævi hans og störf.

Jón Árnason fæddist þann 17. ágúst árið 1819 á Hofi á Skagaströnd, þar sem faðir hans var prestur. Þegar Jón var á sjöunda ári dó faðir hans og var Jón þá með Steinunni, móður sinni. Jón fór síðan í Bessastaðaskóla og lauk stúdentsprófi þar árið 1843. Jón bjó mest alla ævina í Reykjavík og starfaði m.a. sem landsbókavörður og þjóðminjavörður.

Jón fór að safna þjóðsögum og ævintýrum víðs vegar af landinu í samstarfi við Magnús Grímsson. Þeir gáfu út Íslenzk æfintýri árið 1852 en sú bók hlaut dræmar viðtökur. Þeir héldu þó áfram söfnuninni. Magnús lést árið 1860 en Jón hélt þó söfnuninni áfram einn. Á árunum 1862-1864 kom út ritið Íslenzkar þjóðsögur og æfintýri í tveimur bindum.

Jón Árnason dó árið 1888.

Í tilefni þessa dags er tilvalið að lesa nokkrar vel valdar þjóðsögur fyrir börnin. Hér á vef Snerpu má finna fjölmargar þjóðsögur úr safni Jóns Árnasonar. Þjóðsögurnar okkar eru dýrmætur menningararfur sem sýnir okkur inn í fortíð þjóðarinnar, sér í lagi alþýðunnar. Þjóðsögurnar gengu mann fram af manni í margar kynslóðir og það er okkar hlutverk að koma þeim til þeirrar næstu.

Annað sniðugt sem hægt er að gera í tilefni dagsins er að skrifa sína eigin þjóðsögu eða ævintýri. Hægt er að nota sögukastið hér fyrir neðan. Þar þarf að kasta teningum til að finna út hver aðalpersóna sögunnar á að vera, hvenær sagan gerist, hvar og hvað gerist. Svo þarf bara að skálda í eyðurnar.

Í lokin eru hér nokkrar gátur sem Jón Árnason og Ólafur Davíðsson söfnuðu á 19. öld og gáfu út í ritinu Íslenzkar gátur, skemtanir, vikivakar og þulur árið 1887. Gáturnar gætu verið nokkuð skrýtnar fyrir okkur á 21. öldinni en þið getið reynt að spreyta ykkur á þeim.

Á ári hverju einu sinni

alla menn ég sæki heim,

þá sem ei mig eiga í minni

eg óvörum finn, og hverf frá þeim.

Á björtum degi ei birtist lýð,

bragnar sjá þá eigi,

en um nætur alla tíð

er hún ljós á vegi.

Eg er hús með aungum tveim

í mér liggja bræður fimm;

í hörðum kulda hlífi eg þeim,

þó hríðin verði köld og grimm.

Svör: Afmælisdagur, stjarna og vettlingar.

Afmæli Jóns Árnasonar Read More »

Afmæli Tove Jansson – Múmíndagurinn

Leave a Comment / hátíðir, Merkisdagar

Afmæli Tove Jansson - Múmíndagurinn

Þann 9. ágúst næstkomandi er afmælisdagur Tove Jansson, höfundar Múmínálfanna. Tove fæddist árið 1914 í Helsinki í Finnlandi en var af finnlandssænskum ættum. Foreldrar hennar voru bæði listafólk, faðir hennar, Viktor, var myndhöggvari og móðir hennar, Signe, var grafískur hönnuður og myndskreytir. Tove átti tvo bræður, Per og Lars. Þeir fundu einnig köllun sína í listaheiminum, en Per varð ljósmyndari og Lars rithöfundur og teiknimyndasöguhöfundur. Tove skrifaði og skreytti sína fyrstu bók aðeins 14 ára gömul og var farin að selja teikningar í tímarit á svipuðum tíma.

Tove Jansson er fyrst og fremst þekkt fyrir að hafa skrifað sögurnar um Múmínálfana og þær verur þekkja sennilega flest. Fyrsta bókin um Múmínálfana kom út árið 1945 og kjölfarið fylgdu átta bækur til viðbótar um þá. Múmínálfarnir lenda í hinum ýmsu ævintýrum og persónur bókanna fjölbreyttar og skemmtilegar, þótt fyrst og fremst séu Múmínsnáðinn og Múmínmamma aðalpersónur bókanna.

Tove Jansson hitti lífsförunaut sinn, Tuulikki Pietilä eða Tooti, eins og hún var kölluð, árið 1956. Þær bjuggu í sitt hvorri íbúðinni í Helsinki en innangengt var á milli því samkynhneigð varð ekki lögleg fyrr en á 8. áratugnum í Finnlandi. Tove dó úr krabbameini þann 27. Júní 2001, 86 ára að aldri.

Til að halda upp á afmælisdag Tove Jansson og múmíndaginn er hægt að:

Lesa múmínálfana og kynnast lífinu í Múmíndal.
Halda múmínboð að hætti Múmínmömmu með því að;
- skreyta
- bjóða upp á pönnukökur með sultu
- dansa
- halda ræðu
- drekka saft úr múmínbollum

Það er auðvitað skemmtilegast ef þetta er gert í garðinum, en hver gerir það sem hentar. Hér er svo uppskrift að finnskum pönnukökum sem eru bakaðar í ofni.

Finnskar pönnukökur í ofni (Pannukakku)

150 g hveiti

1 tsk lyftiduft

2 msk sykur

Smá salt

4 egg

600 ml mjólk

25 g smjör, bráðið

Setjið hveiti, lyftiduft, sykur og salt í stóra skál og hrærið saman.
Bætið eggjunum út í skálina og hrærið þar til allt hefur blandast vel saman. Á þessum tímapunkti er deigið mjög þykkt. Bætið mjólkinni við smátt og smátt, hærið á milli, þar til allt hefur blandast vel saman og deigið er kekkjalaust.
Leyfið deiginu að standa í a.m.k. ½ klst. Það þykknar aðeins á þeim tíma.
Um það bil 10 mínútum áður en pönnukökurnar fara í ofninn er hann hitaður í 180°C.
Smyrjið eldfast mót með bráðna smjöinu og hellið deiginu í. Bakið í um 30 mínútur. Pönnukakan ætti að hafa risið vel og vera orðin gullinbrún að lit.
Berið fram með flórsykri, sultu og rjóma.

Afmæli Tove Jansson – Múmíndagurinn Read More »