Merkisdagar – Síða 2 – Heimilisvefurinn

Leikir í barnaafmæli

Þegar halda á barnaafmæli er oft sniðugt að vera búin að undirbúa einhverja leiki, sérstaklega ef afmælið á að vera í heimahúsi. Leikirnir þurfa að taka mið af þroska afmælisbarnsins og gestanna en vera um leið skemmtilegir. Leikir hjálpa mikið til við að halda afmælisgestunum uppteknum og passa að allt fari ekki úr böndunum. Hér eru nokkrar hugmyndir að leikjum sem hægt er að framkvæma í innandyra heimahúsi.

1. Stóladans

Fjöldi þátttakenda: ótakmarkaður

Áhöld: Jafn margir stólar og þátttakendur og góð tónlist

Stólunum er raðað upp í lengju með bökin saman. Stjórnandi leiksins tekur einn stólinn burt og setur tónlistina í gang. Þátttakendur ganga í kringum stólana þar til tónlistin stoppar. Þegar tónlistin stoppar eiga þátttakendur að reyna að fá sér sæti en vegna þess að búið er að fjarlægja einn stól verður einn útundan. Hann er úr leik. Stjórnandi leiksins tekur þá annan stól burt og setur tónlistina í gang. Þannig gengur þetta koll af kolli þar til aðeins einn stóll er eftir. Sá er sigurvegari sem nær að setjast á þennan eina stól sem er eftir þegar tónlistin hættir í síðasta sinn.

2. Stoppdans

Fjöldi þátttakenda: ótakmarkaður

Áhöld: tónlist

Stoppdans virkar þannig að þátttakendur dansa á meðan tónlistin hljómar en þurfa að stoppa um leið og tónlistin þagnar. Ef einhver þátttakendanna hreyfir sig eftir að tónlistin hefur verið stoppuð er hann úr leik. Svo fer tónlistin aftur í gang og er stoppuð aftur skömmu síðar. Þeir sem hreyfa sig eru úr leik og þannig gengur þetta koll af kolli. Leikinn er hægt að spila í ákveðinn tíma eða þar til einhver einn stendur uppi sem sigurvegari.

3. Setudans

Fjöldi þátttakenda: ótakmarkaður

Áhöld: tónlist

Setudans er mjög líkur stoppdansi nema að þegar tónlistin þagnar eiga allir þátttakendur að setjast á gólfið. Sá sem er síðastur til að setjast er úr leik. Leikurinn gengur þannig þar til aðeins einn keppandi er eftir.

4. Pakkaleikur

Fjöldi þátttakenda: ótakmarkaður

Áhöld: glaðningur sem hefur verið pakkað inn í mörg lög af pappír og tónlist

Til eru margar útgáfur af pakkaleikjum. Einfaldasta og algengasta útgáfan er þannnig að pakkinn gengur á milli þátttakenda á meðan tónlistin er spiluð. Þegar tónlistin stoppar má sá sem hélt á pakkanum reyna að opna hann. Þegar tónlistin fer aftur í gang heldur pakkinn áfram hringinn og þegar tónlistin stoppar aftur fær þátttakandinn að reyna að opna pakkann. Svona gengur þetta koll af kolli þar til einhver þátttakendanna nær að opna pakkann og fá þá glaðninginn.

5. Pakkaleikur með teningi

Fjöldi þátttakenda: ótakmarkaður

Áhöld: pakki með mörgum lögum af pappír, teningur og vettlingar eða ofnhanskar

Pakkaleikur með teningi er líkur hefðbundnum pakkaleik en ekki er notuð tónlist í þetta sinn heldur teningur og vettlingar. Pakkinn er hafður í miðjunni til að byrja með og teningi er kastað til skiptis af þátttakendum. Um leið og einhver þátttakendanna fær sexu hefst leikurinn fyrir alvöru. Þátttakandinn sem fékk sexuna lætur næsta þátttakenda hafa teninginn og tekur pakkann, setur á sig vettlinga eða ofnhanska og reynir að opna eins mörg lög af pappír og hann getur á meðan næsti þátttakandi kastar teningnum eins oft og hann getur þar til hann fær sexu. Þá lætur þátttakandinn með pakkann þann sem kastaði sexunni fá pakkann og hann reynir að opna eins mikið af pakkanum og hann getur með vettlinga á höndunum. Næsti leikmaður er þá byrjaður að kasta teningnum. Svona gengur þetta koll af kolli þar til einhverjum tekst að opna pakkann og fá þá glaðninginn.

6. Söguleikur

Fjöldi þátttakenda: 3-20

Áhöld: miðar og skriffæri fyrir alla þátttakendur

Söguleikurinn gengur þannig fyrir sig að allir þátttakendur leiksins fá einn eða fleiri miða og eiga að skrifa eitt nafnorð (t.d. Ragga, skæri, sól, bak, kind) á miðann (það má líka ákveða að hafa t.d. sagnorð). Miðarnir eru svo brotnir saman og settir í eitthvað ílát eða poka. Sögumaðurinn byrjar þá að búa til sögu en stoppar söguna reglulega og dregur miða með orði og fléttar orðið inn í söguna. Dæmi: Einu sinni var … (miði dreginn) þvottavél… og hún hét … (miði dreginn)… Sól. Þannig gengur sagan áfram þar til allir miðarnir eru búnir og úr þessu kemur vonandi skemmtileg og fyndin saga.

7. Spurningaleikir

Það er gaman að hafa spurningaleiki í afmælum og þeir geta verið alls konar og sérsniðnir að aldri og þörfum hópsins. Kahoot er mjög auðveldur og aðgengilegur leikur fyrir flesta (ef börnin/unglingarnir eiga síma). Ef símar eru ekki til staðar er hægt að hafa hefðbundinn “pub quiz” leik þar sem spyrillinn spyr og þátttakendur skrifa svarið niður á blað. Passið bara að hafa spurningarnar ekki of erfiðar en þær geta verið nánast um hvað sem er.

8. Hver er undir teppinu?

Fjöldi þátttakenda: 6-20

Áhöld: teppi

Hver er undir teppinu? er einfaldur leikur fyrir yngri börn. Þátttakendur setjast í hring og sá sem er hann fer fram. Á meðan ákveður stjórnandinn hver á að fara undir teppið. Þegar sá sem er hann kemur aftur inn á hann að giska hver það er sem er undir teppinu. Þegar fattast hefur hver er undir teppinu fær sá sem var undir teppinu að vera hann næst. Leik er lokið þegar allilr hafa fengið að prófa að fara undir teppið og vera hann.

9. Í grænni lautu

Fjöldi þátttakenda: 5-20

Áhöld: hringur

Hér er annar sígildur og einfaldur leikur fyrir börn frá 4 ára aldri. Leikurinn er þannig að einn er hann og sá grúfir sig í miðjum hringnum. Hringur er látinn í lóf eins þátttakandans í hringnum og síðan leiðast þátttakendur og ganga í hring á meðan þessi vísa er sungin: Í grænni lautu þar geymi ég hringinn, sem mér var gefinn og hvar er hann nú, sem mér var gefinn og hvar er hann nú? Þegar söngnum lýkur stendur sá sem er hann upp og þátttakendurnir rétta fram kreppta hnefa eins og ef þeir væru með hringinn. Sá sem er hann fær þá þrjár tilraunir til að finna út hver er með hringinn í lófa sínum. Ef hann finnur ekki hringinn grúfir hann aftur, en í næsta skipti eru hendurnar hafðar fyrir aftan bak sem slegið var á í fyrra skiptið.

10. Flöskustútur

Fjöldi þátttakenda: 4-20

Áhöld: flaska

Þátttakendur raða sér í hring sitjandi á gólfinu og einn byrjar að vera hann. Sá sem er hann byrjar á að segja: Sá sem flöskustútur lendir á… og svo eitthvað sem sá sem flöskustútur lendir á að gera eins og t.d. að hoppa fimm sinnum á einum fæti eða fara í kollhnís eða hvað sem honum dettur í hug. Síðan snýr þátttakandinn flöskunni og sá sem flaskan bendir þegar hún stoppar þarf að gera það sem átti að gera. Sá þátttakandi fær svo að gera næst.

11. Bingó

Fjöldi þátttakenda: ótakmarkaður

Áhöld: bingóspjöld o.fl.

Bingó er alltaf skemmtilegt að fara í og hægt er að prenta út bingóspjöld af netinu ef maður á ekki bingóspjöld og það sem þarf. Það er ekki nauðsynlegt að hafa verðlaun, þó það sé alveg skemmtilegt. Verðlaunin geta líka verið þau að fá að vera stjórnandinn í næsta leik.

12. Að fela hlut

Fjöldi þátttakenda: ótakmarkaður

Áhöld: einhver hlutur (t.d. spil úr spilastokki, lítil bók, leikfang)

Einn úr hópnum byrjar að fela hlutinn sem ákveðinn er. Hinir þátttakendurnir fara fram á meðan. Hlutinn er best að fela þannig að það sjáist örlítið í hann. Sá sem faldi segir hinum hvort hluturinn sé falinn hátt (fugl), lágt (fiskur) eða einhvers staðar þar á milli (kisa). Svo hefst leitin og sá sem finnur hlutinn fær að fela næst. Þannig gengur þetta koll af kolli. Það er einnig hægt að leika þennan leik þannig að þátttakendur fá að vita hvort þeir séu heitir eða kaldir eftir því hversu nálægt hlutnum þeir eru eða gefa aðrar vísbendingar.

13. Feluleikur

Fjöldi þátttakenda: ótakmarkaður

Áhöld: engin

Feluleik þarf varla að útskýra fyrir neinum en gaman getur verið að fara í feluleik með öllum í afmælinu. Hægt er að fara í feluleik inni jafnt sem úti.

Leikir í barnaafmæli Read More »

Afmæli Herdísar Egilsdóttur

Þann 18. Júlí næstkomandi verður einn af okkar ástsælustu barnabókahöfundum 89 ára gömul. Það er hún Herdís Egilsdóttir sem fæddist á þeim degi árið 1934 á Húsavík. Hún gekk í Menntaskólann á Akureyri og lauk þaðan stúdentsprófi og fór síðan í Kennaraskóla Íslands. Hún lauk kennaraprófi árið 1953 og fór svo að kenna í Ísaksskóla í Reykjavík. Hún kenndi þar til ársins 1998 og hafði þá kennt um 1500 börnum. Herdís var merkilegur kennari og þróaði kennsluaðferðir eins og Landnámsaðferðina.

Herdís er einnig afkastamikill rithöfundur og hefur skrifað fjöldan allan af bókum, leikritum, sjónvarpsefni og námsefni fyrir börn. Meðal bóka sem Herdís skrifaði eru bækurnar um Siggu og skessuna, sem urðu ansi margar og vinsælar, og bækurnar um Pappírs-Pésa, sem einnig urðu nokkuð margar.

Bækurnar um Siggu og skessuna og Pappírs-Pésa eru auðlesnar bækur fyrir krakka í yngri kantinum. Þær eru tilvaldar í sumarlesturinn fyrir krakka sem eru búin að læra að lesa og vantar bækur til að lesa þetta sumar til að halda við lestrarfærninni. Bækurnar hennar Herdísar eru til á bókasöfnum víða um land.

Við hér á Heimilisvefnum skorum á alla krakka að prófa að lesa allavega eina bók eftir Herdísi Egilsdóttur í tilefni dagsins.

Afmæli Herdísar Egilsdóttur Read More »

Jónsmessan: hugmyndir að hefðum

Fjölskyldan, hátíðir, Merkisdagar

Jónsmessan: hugmyndir að hefðum

Jónsmessa ber upp á 24. júní ár hvert. Hún er merkt á mörg íslensk dagatöl en ekki allir vita hvað þessi Jónsmessa er og af hverju hún er eitthvað sérstök.

En Jónsmessa er sem sagt fæðingarhátíð Jóhannesar skírara. Talið er að Jóhannes hafi skírt Jesús og það er vegna hans sem ýmsir kristnir söfnuðir skíra safnaðarmeðlimi sína. Það er ekki vitað hvenær Jóhannes fæddist og líklega eru ekki miklar líkur á að það hafi verið nákvæmlega 24. júní. Þessi dagur var að sjálfsögðu valinn þegar kristna átti Evrópu og Rómverjar héldu upp á 24. júní sem sumarsólstöðuhátíð (24. des var einmitt vetrarsólstöðuhátíð). Í Norður-Evrópu voru sólstöðuhátíðir einnig haldnar hátíðlegar um svipað leyti. Þar voru haldin mikil blót á þessum dögum. Þegar kristni var tekin upp yfirtóku Jónsmessa (og Jólin) gömlu sólstöðuhátíðirnar.

Á Íslandi var Jónsmessa líklega meiri hátíð í kaþólskum sið og Jónsmessa var reyndar helgidagur (og þá frídagur) þar til 1770. Í dag eru lítil sem engin hátíðarhöld tengd deginum, meira er um það í t.d. Svíþjóð og Finnlandi. Í þeim löndum eru haldnar miklar veislur, brennur og dansleikir sem tengdust oft yfirnáttúrulegum verum á borð við nornum, púkum og draugum. Það hefur ekki tíðkast hér, a.m.k. í ekki í seinni tíð. Við Íslendingar eigum þó nokkrar venjur og þjóðtrú tengda Jónsmessunótt.

Þjóðtrú tengd Jónsmessu

Jónsmessunótt hefur lengi verið álitin ein af fjórum mögnuðustu nóttum ársins hér á landi ásamt jólanótt, nýjársnótt og þrettándanótt. Allar þessar nætur eru nálægt sólhvörfum og eiga það sameiginlegt að þær þóttu góðar til útisetu á krossgötum, að kýr tali og að selir fari úr hömum sínum. Sú þjóðtrú er líka þekkt víða um Evrópu. Hjátrú sem er einungis tengd Jónsmessu er svo;

Döggin

Á Jónmessunótt átti fólk að velta sér nakið upp úr dögginni. Döggin átti að geta læknað kláða og fjöldan allan af öðrum húðmeinum. Helst átti að láta döggina þorna sjálfa á líkamanum. Margir láta það duga að setja dögg í andlit sitt eða ganga berfættir í henni.

Náttúrusteinar

Á Jónsmessunótt á að vera líklegra að finna náttúrusteina með töframátt en aðrar nætur ársins. Ýmsa töfrasteina má finna í náttúru Íslands, samkvæmt þjóðtrúnni. Lausnarsteinar eru steinar sem eiga að hjálpa konum við barnsburð og sömuleiðis kúm. Óskasteinar eða varnarsteinar geta hjálpað manni gegn illum öflum. Lífssteinar eiga að geta grætt sár og hulinhjálmssteinn veitir eiganda sínum hulinshjálm, gerir mann m.a.o. ósýnilegan.

Sumir staðir á Íslandi eru taldir líklegri til að geyma náttúrusteina með töframætti. Það eru t.d. Drápuhlíðarfjall á Snæfellsnesi, Klakkur milli Kolgrafarfjarðar og Grundarfjarðar, Kofri við Álftafjörð í Ísafjarðardjúpi, Tindastóll í Skagafirði upp undan Glerhallavík og Baula í Borgarfirði. Á síðastnefnda fjallinu á að vera tjörn á tindinum og í henni óskasteinn. Steininn flýtur aðeins upp á Jónsmessunótt og sá sem nær steininum fær óskir sínar uppfylltar.

Grös og blóm

Jónsmessunótt þykir góð nótt til að tína ýmsar lækningajurtir s.s. lyfjagras, horblöðku, brennisóley og mjaðjurt. Eiga þessar jurtir að hafa lækningamátt og sumar mátti meira að segja nota til annars. Mjaðjurt var t.d. hæg t að nota til að vita hver hefði stolið af manni og með brönugrasi var hægt að vinna ástir einhvers.

Önnur hjátrú eða hefð tengd Jónsmessunni er að ógiftar konur eða stúlkur geti tínt sjö (eða níu) mismunandi blómategundir á Jónsmessunótt en það þarf þó að gerast í hljóði. Blómvöndurinn er svo settur undir koddann og um nóttina á þær að dreyma framtíðar maka sinn.

Hin Norðurlöndin

Á hinum Norðurlöndunum, og sérstaklega í Svíþjóð og Finnlandi, er Jónsmessan stór fjölskyldu- og sumarhátíð. Þar eru margar eru margar hefðir tengdar deginum (og nóttunni auðvitað). Öll löndin eiga það sameiginlegt að hafa brennu á Jónsmessunótt og fara í leiki. Í Danmörku eru pappírsnornir brenndar og lög sungin við brennuna.

Í Finnlandi er farið í miðsumarssauna, brennur haldnar og dansar dansaðir með fjölskyldu og vinum við maístöngina. Sveitarfélög hafa boðið upp á brennur og skemmtanir í seinni tíð. Hátíðarmatinn má ekki vanta og eru fiskréttir og kartöflur vinsælastar ásamt jarðarberjum.

Miðsumarshátíðin í Svíþjóð er nokkuð lík þeirri í Finnlandi, þar er dansað í kringum maístöngina, sem er stöng sem er skreytt með laufum, blómum og marglitum borðum. Farið er í leik eftir dansinn og algengt fyrir konur og börn að vera með blómakrans í hárínu. Í Svíþjóð er algengasti maturinn á þessum degi, síld, sýrður rjómi, graslaukur, kartöflur og jarðarber í eftirrétt. Kartöflurnar eru gjarnan bornar fram með dilli og snaps drukkið með matnum.

Að búa til Jónsmessuhefðir

Líklega verður Jónsmessa aldrei jafn stór hátíð hér á landi og á hinum Norðurlöndunum. Við getum hins vegar sjálf tekið það upp hjá okkur að halda aðeins upp á þennan dag með okkar nánustu fjölskyldu. Eins og áður hefur komið fram hér á Heimilisvefnum þá þurfum við að muna að það erum við sem sköpum minningar og búum til hefðir fyrir næstu kynslóð. Ef við búum eitthvað til úr Jónsmessunni verður hún sérstök fyrir börnunum okkar.

Auðvitað má Jónsmessan vera jafn stór eða lítil og fólk vill en það er margt sem er hægt að gera með fjölskyldunni á þessum degi og nóttina áður. Af íslenskum hefðum er auðvelt að;

Velta sér upp úr dögginni eða a.m.k. labba um berfættur í henni.
Tína sjö eða níu blómategundir og setja undir koddann hjá sér og fá þá að sjá væntanlega maka í draumi.
Leita að óskasteinum, sem á að vera auðveldara þessa nótt en aðrar. Hugsanlega er hægt að fara í fjallgöngu þetta kvöld til að reyna að leita að steinum á fjöllum.

Af siðum og hefðum hinna Norðurlandanna er hægt að;

Brenna pappírsnornir að hætti Dana.
Fara í sauna að hætti Finna eða gufubað.
Búa til blómakrans til að hafa á hausnum.
Fara í skemmtilega leiki úti.
Borða góðan fiskrétt með kartöflum og jarðarber með rjóma í eftirrétt.
Ef maður vill fara “all in” þá er hægt að hafa brennu eða varðeld og syngja nokkur lög. Athugið að óheimilt er að brenna bálköst nema samkvæmt skriflegu leyfi sýslumanns, skv. 21. gr. Ekki þarf þó leyfi sýslumanns til að brenna bálköst þar sem brennt er minna en 1 m³ af efni. Sjá hér.

Jónsmessan: hugmyndir að hefðum Read More »

Hugmyndir fyrir 17. júní

Fjölskyldan, hátíðir, Merkisdagar

Hugmyndir fyrir 17. júní

Hæ, hó, jibbí jei! Það er að koma 17. júní! Hvað ætlar þú að gera til að fagna þjóðhátíðardeginum í ár? Sum ætla sjálfsagt að kíkja á skipulagða dagskrá og hugsanlega fá sér köku í tilefni dagsins. Önnur gera ekkert sérstakt á þessum degi. Íslendingar gætu og mættu alveg gera meira úr þessum degi en gert er núna. Hinum megin við hafið halda Norðmenn rækilega upp á sinn dag, 17. maí, með skrúðgöngum og skála í mímósum yfir morgunmatnum.

Við hjá Heimilisvefnum værum til í að sjá Íslendinga halda betur og meira upp á þennan dag, bæði fyrir okkur fullorðnu og fyrir krakkana. Munum að það er í okkar höndum að búa til hefðir og skapa minningar fyrir næstu kynslóð. Ef við búum til okkar eigin góðu 17. júní-hefðir munu börnin vilja halda áfram með þær þegar þau vaxa úr grasi fyrir sín eigin börn. Og það er sko ýmislegt skemmtilegt hægt að gera í tilefni þessa merkilega dags.

Hér eru nokkrar hugmyndir að skemmtilegum hlutum til að gera á 17. júní – að mörgu leyti er 17. maí Norðmanna innblásturinn að hugmyndunum.

Skreytingar

Áður en dagurinn rennur upp er hægt að fara að byrja að skreyta heima hjá sér. Skreytingarnar þurfa ekki að vera flóknar og best er ef hægt er að nota þær ár eftir ár. Hægt er að kaupa íslenska fána af öllum stærðum og gerðum, servíettur, blöðrur, fánalengjur eða veifur o.fl. í búðum sem sérhæfa sig í partýskrauti. En fjölskyldan getur líka átt góða stund við að föndra skraut sjálf. Svo er fallegt að kaupa blómvönd í tilefni dagsins. Ef þið eigið fánastöng er auðvitað alveg nauðsynlegt að flagga.

Um gasblöðrur og fleira

Þetta tengist svolítið skreytingunum hér að ofan. Á 17. júní er auðvitað alveg klassískt að börnin fái gasblöðrur. Þetta er eitthvað sem mætti þó hreinlega sleppa. Því bæði búum við til óþarfa plastrusl og erum að sóa dýrmætri helíumauðlindinni. Stjörnu-Sævar útskýrði þetta vel og rökstuddi í Facebook-færslu fyrir 17. júní árið 2020. Í stað gasblaðra er miklu betra að kaupa sér íslenskan fána til að veifa og hann er hægt að nota ár eftir ár. Fáni, candyfloss, pylsa og hoppukastali – þurfa börnin eitthvað meira en það?

Skipulög dagskrá og skrúðganga

Ef einhver skipulögð dagskrá eða skrúðganga er í þínu bæjarfélagi er auðvitað einfalt að kíkja á það. Skemmtunin er oft miðuð að börnum á leikskólaaldri svo þetta er kannski ekki spennandi fyrir alla aldurshópa en stundum er eitthvað eins og andlitsmálning og hoppukastalar í boði líka. Ræðuhöldin höfða sennilega til fárra af yngri kynslóðinni (og líka þeirrar eldri reynar). Munið eftir fánum til að veifa!

Klæðnaður

Sama hvað þú kýst að gera á þessum degi er samt mjög einfalt að fara að minnsta kosti í fín föt. Þetta er einn af þessum dögum þar sem hægt er að dusta rykið af gamla þjóðbúningnum hennar ömmu og nota hann. Við hin, sem eigum ekki þjóðbúning, getum bara farið í venjuleg fín föt.

En talandi um klæðnað, að þá er gott að vera við öllu búin hvað veður varðar. Við búum jú á Íslandi og hér er allra veðra von, líka í júní.

Matur og fjölskylda

Það sem Norðmenn gera svo vel á þessum degi er að hitta vini og ættingja, oftast í morgunmat, bröns, kaffiboð eða grill um kvöldið. Þetta er vel hægt að gera hér. Bjóða vinum og/eða fjölskyldunni í morgunmat eða bröns og borða góðan hátíðarmat saman og skála í mímósum, freyðivíni – ja, eða bara eplasíder. Skipulögð dagskrá er oft á milli 11 og 15 á daginn svo ef maður vill halda áfram með að bjóða fólki heim eða fara í boð er hægt að vera með kaffiboð seinni partinn eða grillveislu um kvöldið. Hver hefur það eins og hann vill. Nokkrar hugmyndir að þjóðlegum bröns eða kaffiboði væri að hafa:

Íslenskar pönnukökur, lummur eða vöfflur
Hjónabandssæla
Flatkökur með hangikjöti
Rúgbrauð með smjöri
Brauðterta og/eða heitur brauðréttur
Rjómaterta (að sjálfsögðu skreytt með jarðarberjum og bláberjum)
Kleinur

En auðvitað er hægt að hafa hvað sem er.

Leikir í garðinum

Tengt því að hitta fjölskylduna og vinina í mat þá er hægt að vera með leiki fyrir krakkana í garðinum. Sérstaklega á þetta vel við ef það er engin skipulögð dagskrá í bæjarfélaginu. Það er til dæmis hægt að fara í pokahlaup, stófiskaleik, fótbolta, pílu, badminton eða blása sápukúlur eða búa til einhverja þrautabraut eða þrautir fyrir þau. Önnur hugmyndi væri að hafa skrúðgöngu í kringum húsið eða dansa konga. Hvetjum fullorðna fólkið eindregið til að vera með í fíflalátunum.

Ef maður á ekki garð er vel hægt að fara í einhvern almenningsgarð eða grasflöt í nágrenninu.

Sjónvarpið

Rétt eins og mörgum finnst ómissandi að hafa kveikt á messunni yfir jólamatnum á aðfangadagskvöld til að skapa réttu stemninguna er hægt að hafa kveikt á sjónvarpinu yfir daginn. Það þarf ekkert endilega að horfa með heilum hug á hátíðardagskránna við Austurvöll en það er pínu hátíðleiki í því að hafa kveikt á þessu í bakgrunni. Á RÚV er þó nokkur hátíðardagskrá þennan dag. Um kvöldið getur svo fjölskyldan sest saman eftir daginn og horft á stórmyndina Með allt á hreinu (árið 2023 allavega).

Aðrar hugmyndir

Það er margt annað hægt að gera á 17. júní en bara þetta. Það er líka hægt að fara í sund og fá sér ís á eftir. Það er mjög íslenskt. Eins er hægt að fara í fjallgöngu og kannski taka með sér sparinesti og borða á toppnum. Eða sleppa fjallinu og fara í göngutúr og stoppa á einhverjum fallegum og góðum stað til að borða nesti. Nestið getur alveg verið frekar hátíðlegt, t.d. pönnukökur, kleinur, hjónabandssæla og flatkökur. Það er líka hægt að gera þetta að hjólatúr. Ef veðrið er ekki gott, eins og gerist nú nokkuð oft á 17. júní á Íslandi er hægt að fara í bíltúr eitthvert og fá sér svo kannski ís líka. Allt er þetta mjög íslenskt og skemmtilegt. En fyrst og fremst snýst þetta um að gera eitthvað með fjölskyldunni og okkar nánustu. Flest börn óska sér einskis heitar en að fá að vera meira með foreldrum og fjölskyldu.

Að lokum eru hér litamyndir með 17. júní-þema. Ein myndin er af íslenska fánanum og hana er hægt að nota til að skreyta.

Góða skemmtun og til hamingju Ísland!

Hugmyndir fyrir 17. júní Read More »

Sjómannadagurinn 2023 – Hvað er um að vera og hvað er hægt að gera?

Leave a Comment / Fjölskyldan, hátíðir, Merkisdagar, samvera

Sjómannadagurinn er haldinn hátíðlegur fyrsta sunnudag í júní hvert ár, nema ef hvítasunnu ber upp þann dag og er þá sjómannadagurinn haldinn helgina eftir. Í ár verður sjómannadagurinn haldinn hátiðlegur þann 4. júní. Sjómannadagurinn var fyrst haldinn þann 6. júní árið 1938 í Reykjavík og á Ísafirði en það var ekki fyrr en 1987 sem dagurinn varð lögskipaður frídagur sjómanna.

Á sjómannadaginn heiðrum við sjómenn. Ísland er eyja og því haf allt í kringum okkur. Í gegnum aldinar hefur hafið gefið og tekið frá okkur. Hafið hefur haldið í okkur lífinu hér á þessu hrjóstuga landi lengst í norðri og stuðlað að velmegun íslensks samfélags.

Víða um land er sjómannadagurinn haldinn hátíðlegur með skemmtilegri dagskrá fyrir alla fjölskylduna. Það er tilvalið að skella sér á einhverra þeirra ef tækifæri gefst. Heimilisvefurinn hefur tekið saman lista yfir bæi þar sem sjómannadagurinn verður haldinn hátíðlegur í ár:

Ef þú sérð að einhvern bæinn vantar skaltu endilega hafa samband og láta okkur vita á heimilisvefurinn@heimilisvefurinn.is

Fyrir þau sem komast ekki á sjómannadagsskemmtanir eða langar að gera meira þá er auðvitað mjög gaman að skella sér í fjöruferð. Ef það er heldur ekki í boði eru hér nokkrar hugmyndri að einhverju sjómannalegu til að dunda við inni.

Heimilisvefurinn býður upp á ókeypis skemmtihefti fyrir börn með sjávar- og sjómannadagsþema. Hægt er að ná í það hér.

Svo er gaman að perla, leira eða teikna eitthvað tengt sjónum.

Enn fleiri hugmyndir er hægt að finna á pinterestsíðu Heimilisvefsins.

Góða skemmtun!

Sjómannadagurinn 2023 – Hvað er um að vera og hvað er hægt að gera? Read More »

Hvað á ég að skrifa í skírnarkort?

kort, Merkisdagar, nafngjöf, skírn, Veislur

Ertu á leið í skírn eða nafngjöf og veist ekkert hvað þú átt að skrifa í kortið til elsku litla barnsins sem er að fara að fá nafnið sitt? Heimilisvefurinn hefur tekið saman nokkrar kveðjur sem skrifa má í skírnar- eða nafngjafarkort til að hjálpa þér við verkið.

Eins og með öll skrif er gott að byggja skírnar- eða nafngjafarkort þannig upp að þau hafi upphaf, miðju og endi. Í kortum er þó reyndar best að byrja á ávarpi til þess sem er að fá nafnið sitt, en það er líka hægt að flétta ávarpið inn í upphaf kortsins. Svo tekur við smá texti fyrir miðju kortsins til að gera það persónulegra og loks endar maður á einhvers konar kveðju og nafninu sínu. Hér fyrir neðan eru hugmyndir að ávörpum, hvað skrifa má í upphafi, miðjunni og í lokin.

Ávarp

Ólíkt öðrum kortum er yfirleitt ekki vitað nafn þess sem á að fá skírnar- eða nafngjafarkort. Athöfnin og veislan snýst jú út á það að tilkynna nafn barnsins. Í þessu tilfelli er t.d. hægt að skrifa:

Til elsku litla barnsins/litla drengsins/litlu stúlkunnar
Elsku litla/litli…
Litla snót eða snáði
Kæra barn
Til barnsins

Upphaf

Hér eru nokkrar uppástungur til að byrja skírnar- eða nafngjafarkortið. Það er vel hægt að flétta ávarpinu inn í þessar hamingjuóskir með því t.d. að segja „Innilega til hamingju með daginn elsku litla barn“.

(Innilega/Hjartanlega)til hamingju með daginn
(Innilega/Hjartanlega)til hamingju með daginn elsku barn
(Innilega/Hjartanlega)til hamingju með skírnina
(Innilega/Hjartanlega)til hamingju með skírnina elsku barn
(Innilega/Hjartanlega)til hamingju með (fallega) nafnið þitt
(Innilega/Hjartanlega)til hamingju með nafnið þitt elsku barn
(Innilega/Hjartanlega)til hamingju á skírnardaginn/nafngjafardaginn
(Innilega/Hjartanlega)til hamingju með inngöngu þína í þjóðkirkjuna
(Innilegar/Hjartanlegar) hamingjuóskir á skírnardaginn/nafngjafardaginn
(Innilegar/Hjartanlegar) hamingjuóskir með fallega nafnið þitt
(Innilegar/Hjartanlegar) hamingjuóskir með skírnina/nafngjöfina
(Innilegar/Hjartanlegar) hamingjuóskir með daginn elsku barn
(Innilegar/Hjartanlegar) hamingju- og blessunaróskir á skírnardaginn

Miðja

Eftir hamingjuóskirnar er gott að koma með einhverja persónulega kveðju til barnsins. Hér má auðvitað velja fleiri en einn hlut til að setja í kortið. Það er líka fallegt að skrifa stutt ljóð til barnsins eða finna fallegan texta úr Biblíunni, Hávamálum eða öðru trúarriti, eftir því sem við á. Hér eru hugmyndir að alls kyns kveðjum til barnsins:

Megi gleði og gæfa fylgja þér (alla tíð/um ókomna tíð/um alla framtíð/um aldur og ævi)
Megi gæfan fylgja þér (alla tíð/um ókomna tíð/um alla framtíð/um aldur og ævi)
Megi allt ganga þér í haginn (um ókomna tíð/um alla framtíð/um aldur og ævi)
Með ósk um (bjarta/gæfuríka) framtíð
Guð gefi þér (fallega/bjarta) og (gæfuríka/gleðiríka) framtíð
Með von um (bjarta/gæfuríka) framtíð
Bjarta/gæfuríka framtíð
Megi góður Guð blessa þig og varðveita (alla tíð/um ókomna tíð/um alla framtíð/um aldur og ævi)
Ég óska þér (gæfuríkrar/bjartrar/hamingjuríkrar) framtíðar
Gangi þér sem best í komandi ævintýrum
Gangi þér sem allra best í þeim ævintýrum sem lífið hefur upp á að bjóða
Megi trúin verða þér hvatning og styrkur á lífsleiðinni
Gæfan fylgi þér (alla tíð/um ókomna tíð/um alla framtíð/um aldur og ævi)
Megi líf þitt ljóma af því góða, fagra og sanna

Endir

Í lokin þarf að loka afmæliskveðjunni með t.d.:

Bestu kveðjur, [nöfn]
Bestu kveðjur frá [nöfn]
Bestur kveðjur og hamingjuóskir frá [nöfn]
Með kveðju, [nöfn]
Kveðja, [nöfn]
Kær kveðja, [nöfn]
Þín vinkona/þinn vinur/þínir vinir/þínar vinkonur, [nöfn]

Og nafninu þínu/nöfnunum ykkar.

Hvað á ég að skrifa í skírnarkort? Read More »

Hvað á ég að skrifa í brúðkaupskort?

gifting, kort, Merkisdagar, Veislur

Ertu á leið í brúðkaup og ert í vandræðum með að finna eitthvað til að skrifa í kortið? Heimilisvefurinn hefur tekið saman hugmyndir og leiðbeiningar að því hvernig og hvað er hægt að skrifa í brúðkaupskort.

Eins og með öll skrif er gott að byggja útskriftarkort þannig upp að þau hafi upphaf, miðju og endi. Í kortum er þó reyndar best að byrja á ávarpi til þess sem er að útskrifast, en það er líka hægt að flétta ávarpið inn í upphaf kortsins. Svo tekur við smá texti fyrir miðju kortsins til að gera það persónulegra, jafnvel þótt maður þekki manneskjuna ekki vel, og loks endar maður á einhvers konar kveðju og nafninu sínu. Hér fyrir neðan eru hugmyndir að ávörpum, hvað skrifa má í upphafi, miðjunni og í lokin.

Ávarp

Ávörp eru mis persónuleg og fer það allt eftir því hvernig þú þekkir manneskjuna.

Til elsku…
Elsku…
Kæru…
Kæru… mín/mínir/mínar
Til…
Elsku brúðhjón

Upphaf

Hér eru nokkrar uppástungur til að byrja brúðkaupskortið. Það er vel hægt að flétta ávarpið inn í þessar hamingjuóskir með því t.d. að segja „Innilega til hamingju með daginn elsku [nöfn] mín“.

(Innilega/Hjartanlega) til hamingju með daginn
(Innilega/Hjartanlega) til hamingju með daginn ykkar
(Innilega/Hjartanlega) til hamingju með hvort annað
(Innilega/Hjartanlega) til hamingju með brúðkaupið/giftinguna
(Innilega/Hjartanlega) til hamingju með þennan stóra áfanga
(Innilega/Hjartanlega) til hamingju með þennan stóra áfanga í lífinu
(Innilega/Hjartanlega) til hamingju með þessi merku tímamót
Bestu framtíðaróskir í tilefni dagsins
Bestu framtíðaróskir á þessum merku tímamótum
(Innilegar/Hjartanlegar) hamingjuóskir með daginn
(Innilegar/Hjartanlegar) hamingjuóskir með daginn ykkar
(Innilegar/Hjartanlegar) hamingjuóskir með brúðkaupið/giftinguna
(Innilegar/Hjartanlegar) hamingjuóskir þennan stóra áfanga
(Innilegar/Hjartanlegar) hamingjuóskir þennan stóra áfanga í lífinu
(Innilegar/Hjartanlegar) hamingjuóskir með þessi merku tímamót
(Innilegar/Hjartanlegar) hamingjuóskir með hvort annað

Miðja

Eftir hamingjuóskirnar er gott að koma með einhverja persónulega kveðju til verðandi brúðhjóna. Hér má auðvitað velja fleiri en einn hlut til að setja í kortið. Það er líka fallegt að skrifa stutt ljóð til þeirra sem eru að gifta sig. Hér eru hugmyndir að alls kyns kveðjum til brúðhjónanna:

Aumt er ástlaust líf
Ást er besta kryddið
Ást er laun ástar
Ást er öllum hlutum kærari
Ástin sigrar allt
,,Ástin er töfrasteinn sem breytir veröldinni í aldingarð” – Robert Louis Stevenson
Ást er ekki það sem fær Jörðina til að snúast. Hún er það sem gerir það þess virði að snúast með
Ást er tvær samhljóma sálir og tvö hjörtu sem slá í takt
Ástin gefur hinum líflausu líf. Ástin tendrar loga í köldum hjörtum. Ástin færir hinum vonlausu von og gleður hjörtu hinna sorgmæddu. Ástin sýnir veruleika sinn í verki, ekki aðeins orðum – þau ein duga ekki. – Adbu’l-Bahá
,,Ástin gefur ekkert nema sjálfa sig og þiggur ekkert nema sjálfa sig” – Khalil Gibran
,,Ástin á engar eignir og verður aldri eign því ástin á sig sjálf og er sjálfri sér leg” – Khalil Gibran
Eiginmaður er sá sem stendur með þér í erfiðleikunum sem þú hefðir aldrei lent í ef þú hefðir ekki gifst honum
Ég vona að þið eigið [yndislegan/frábæran] dag
Ég vona að þið lifið vel og lengi
Ég óska ykkur velfarnaðar (alla tíð/um ókomna tíð/um aldur og ævi/í framtíðinni/um alla framtíð)
Ég óska ykkur [gæfuríkrar/bjartrar/gleðiríkrar/fallegrar] framtíðar
Gangi ykkur sem allra best í öllu því sem þið takið ykkur fyrir hendur
Gangi ykkur vel í komandi ævintýrum
Gangi ykkur sem allra best í komandi ævintýrum
Hafið það sem allra, allra best
Hamingjusamt hjónaband er hús sem reisa verður daglega
Lifið heil/heill
Með ósk um [bjarta/gæfuríka/gleðiríka] framtíð
Með von um [bjarta/gæfuríka/gleðiríka] framtíð
Megi dagurinn verða ykkur ógleymanlegur
Megi gleði og gæfa fylgja ykkur (alla tíð/um ókomna tíð/um aldur og ævi/í framtíðinni/um alla framtíð)
Megi gæfan fylgja ykkur (alla tíð/um ókomna tíð/um aldur og ævi/í framtíðinni/um alla framtíð)
Megi góður Guð blessa ykkur og varðveita (alla tíð/um ókomna tíð/um aldur og ævi/um alla framtíð)
Megi hamingjan fylgja ykkur í öllu sem þið tekur ykkur fyrir hendur
Megi allt ganga ykkur í haginn (alla tíð/um ókomna tíð/um aldur og ævi/í framtíðinni/um alla framtíð)
Megi lífið leika við ykkur (alla tíð/um ókomna tíð/um aldur og ævi/í framtíðinni/um alla framtíð)
Njótið dagsins í ræmur
Njótið dagsins!
Sönn hamingja er að vera giftur besta vini sínum/bestu vinkonu sinni
Vonandi eigið þið [yndislegan/frábæran] dag

Endir

Í lokin þarf að loka kveðjunni með t.d.:

Bestu kveðjur, [nöfn]
Bestu kveðjur frá [nöfn]
Bestur kveðjur og afmælisóskir frá [nöfn]
Með kveðju, [nöfn]
Megi partýið [byrja/hefjast]
Kveðja, [nöfn]
Kær kveðja, [nöfn]
Þín vinkona/þinn vinur/þínir vinir/þínar vinkonur, [nöfn]

Og nafninu þínu/nöfnunum ykkar.

Nú getur þú sett saman þína eigin persónulegu og flottu kveðju til brúðhjónanna!

Hvað á ég að skrifa í brúðkaupskort? Read More »

Hvað á ég að skrifa í útskriftarkort?

kort, Merkisdagar, útskrift, Veislur

Ertu á leið í útskriftarveislu og ert í vandræðum með að finna eitthvað til að skrifa í útskriftarkort? Hvort sem manneskjan er að útskrifast úr grunn-, framhalds- eða háskóla þá eru hér hugmyndir og leiðbeiningar til að skrifa fallega kveðju í útskriftarkort.

Ávarp

Ávörp eru mis persónuleg og fer það allt eftir því hvernig þú þekkir manneskjuna.

Til elsku…
Elsku…
Kæri/kæra…
Kæri/kæra… minn/mín/mitt
Til…
Elskulega vinkona/elskulegi vinur

Upphaf

Hér eru nokkrar uppástungur til að byrja útskriftarkortið. Það er vel hægt að flétta ávarpinu inn í þessar hamingjuóskir með því t.d. að segja „Innilega til hamingju með daginn elsku [nafn] mín“.

(Innilega/Hjartanlega) til hamingju með daginn
(Innilega/Hjartanlega) til hamingju með daginn þinn
(Innilega/Hjartanlega) til hamingju með áfangann
(Innilega/Hjartanlega) til hamingju með þennan stórmerkilega áfanga
(Innilega/Hjartanlega) til hamingju með útskriftina
(Innilega/Hjartanlega) til hamingju með þennan stóra áfanga
(Innilega/Hjartanlega) til hamingju með þennan stóra áfanga í lífinu
(Innilega/Hjartanlega) til hamingju með þessi merku tímamót
(Innilega/Hjartanlega) til hamingju með áfangann sem þú fagnar hér í dag
(Innilega/Hjartanlega) til hamingju með þennan stóra áfanga sem þú fagnar hér í dag
Til lukku með daginn
Bestu framtíðaróskir í tilefni dagsins
Bestu framtíðaróskir á þessum merku tímamótum
(Innilegar/Hjartanlegar) hamingjuóskir með þennan stórmerkilega áfanga
(Innilegar/Hjartanlegar) hamingjuóskir með daginn
(Innilegar/Hjartanlegar) hamingjuóskir með daginn þinn
(Innilegar/Hjartanlegar) hamingjuóskir með áfangann
(Innilegar/Hjartanlegar) hamingjuóskir með útskriftina
(Innilegar/Hjartanlegar) hamingjuóskir þennan stóra áfanga
(Innilegar/Hjartanlegar) hamingjuóskir þennan stóra áfanga í lífinu
(Innilegar/Hjartanlegar) hamingjuóskir með þessi merku tímamót
(Innilegar/Hjartanlegar) hamingjuóskir með þennan stóra áfanga sem þú fagnar hér í dag

Endir

Í lokin þarf að loka afmæliskveðjunni með t.d.:

Bestu kveðjur, [nöfn]
Bestu kveðjur frá [nöfn]
Bestur kveðjur og afmælisóskir frá [nöfn]
Með kveðju, [nöfn]
Megi partýið [byrja/hefjast]
Kveðja, [nöfn]
Kær kveðja, [nöfn]
Þín vinkona/þinn vinur/þínir vinir/þínar vinkonur, [nöfn]

Og nafninu þínu/nöfnunum ykkar.

Miðja

Á tindinn hefur klifið, áfanga náð. Við þér lífið blasir, framtíðin björt. Dreymdu drauma og vittu til. Þeir munu rætast.
Bjarta framtíð
Bjarta og gæfuríka framtíð
Blindur er bóklaus maður
Ég vona að þú eigir [yndislegan/frábæran] dag
Ég óska þér velfarnaðar í framtíðinni
Ég óska þér velfarnaðar um aldur og ævi
Ég óska þér velfarnaðar um ókomna tíð
Ég óska þér gæfuríkrar framtíðar
Gangi þér sem allra best í öllu því sem þú tekur þér fyrir hendur
Gangi þér vel í öllu því sem þú tekur þér fyrir hendur
Gangi þér sem allra best í því sem þú tekur þér fyrir hendur
Gangi þér vel í komandi ævintýrum
Gangi þér sem allra best í komandi ævintýrum
Gangi þér alla í haginn
Lifðu heil/heill
Líf þitt verður ekki betra en áætlanir þínar og athafnir. Þú ert húsameistari og smiður lífs þíns, gæfu þinnar og örlaga – A.A.M.
Maður sem ekkert nám stundar alla ævi sína er eins og maður sem ferðast um niðdimma nótt
Með ósk um [bjarta/gæfuríka] framtíð
Með von um [bjarta/gæfuríka] framtíð
Megi dagurinn verða þér ógleymanlegur
Megi gleði og gæfa fylgja þér alla tíð
Megi gleði og gæfa fylgja þér um ókomna tíð
Megi gleði og gæfa fylgja þér um aldur og ævi
Megi gleði og gæfa fylgja þér í framtíðinni
Megi gleði og gæfa fylgja þér um alla framtíð
Megi gleði og gæfa fylgja þér og þínum alla tíð
Megi gleði og gæfa fylgja þér og þínum um ókomna tíð
Megi gleði og gæfa fylgja þér og þínum um aldur og ævi
Megi gleði og gæfa fylgja þér og þínum í framtíðinni
Megi gleði og gæfa fylgja þér og þínum um alla framtíð
Megi gæfan fylgja þér alla tíð
Megi gæfan fylgja þér um ókomna tíð
Megi gæfan fylgja þér um aldur og ævi
Megi gæfan fylgja þér í framtíðinni
Megi gæfan fylgja þér um alla framtíð
Megi hamingjan fylgja þér í öllu sem þú tekur þér fyrir hendur
Megi allt ganga þér í haginn í framtíðinni
Megi allt ganga þér í haginn alla tíð
Megi allt ganga þér í haginn um aldur og ævi
Megi allt ganga þér í haginn um alla framtíð
Megi allt ganga þér í haginn um ókomna tíð
Megi lífið leika við þig alla tíð
Megi lífið leika við þig um ókomna tíð
Megi lífið leika við þig um alla framtíð
Njóttu dagsins í ræmur
Njóttu dagsins!
Vonandi áttu [yndislegan/frábæran] dag
Vonandi mun námið nýtast þér vel í lífi og starfi
Vonandi verður dagurinn jafn [yndislegur/skemmtilegur/frábær] og þú ert
Vonandi verður dagurinn jafn [yndislegur/skemmtilegur/frábær] og þú ert alltaf
Þú getur allt sem þú ætlar þér
Þú hefur lagt mikið á þig til að ná markmiðum þínum og nú uppskerð þú eins og þú sáðir

Nú getur þú sett saman þína eigin persónulegu og flottu útskriftarkveðju!

Hvað á ég að skrifa í útskriftarkort? Read More »

Hvað á ég að skrifa í fermingarkort?

ferming, kort, Merkisdagar, Veislur

Það vefst fyrir mörgum hvað skrifa á í fermingarkort, sérstaklega ef maður þekkir fermingarbarnið ekki vel. Heimilisvefurinn hefur tekið saman nokkrar kveðjur sem skrifa má í fermingarkort eða í siðfestukort.

Eins og með öll skrif er gott að byggja fermingarkort eða siðfestukort þannig upp að þau hafi upphaf, miðju og endi. Í kortum er þó reyndar best að byrja á ávarpi til þess sem er að fermast, en það er líka hægt að flétta ávarpið inn í upphaf kortsins. Svo tekur við smá texti fyrir miðju kortsins til að gera það persónulegra, jafnvel þótt maður þekki manneskjuna ekki vel, og loks endar maður á einhvers konar kveðju og nafninu sínu. Hér fyrir neðan eru hugmyndir að ávörpum, hvað skrifa má í upphafi, miðjunni og í lokin.

Ávarp

Ávörp eru mis persónuleg og fer það allt eftir því hvernig þú þekkir manneskjuna.

Til elsku…
Elsku…
Kæri/kæra…
Kæri/kæra… minn/mín/mitt
Til…
Elskulega vinkona/elskulegi vinur

Upphaf

Hér eru nokkrar uppástungur til að byrja fermingar- eða siðfestukortið. Það er vel hægt að flétta ávarpinu inn í þessar hamingjuóskir með því t.d. að segja „Innilega til hamingju með daginn elsku [nafn] mín“.

(Innilega/Hjartanlega) til hamingju með daginn
(Innilega/Hjartanlega) til hamingju með daginn þinn
(Innilega/Hjartanlega) til hamingju með áfangann
(Innilega/Hjartanlega) til hamingju á fermingardaginn/siðfestudaginn
(Innilega/Hjartanlega) til hamingju með ferminguna/siðfestuna
(Innilega/Hjartanlega) til hamingju með þennan stóra áfanga
(Innilega/Hjartanlega) til hamingju með þennan stóra áfanga í lífinu
(Innilega/Hjartanlega) til hamingju með þessi merku tímamót
(Innilega/Hjartanlega) til hamingju með áfangann sem þú fagnar hér í dag
(Innilega/Hjartanlega) til hamingju með þennan stóra áfanga sem þú fagnar hér í dag
(Innilega/Hjartanlega) til hamingju með að hafa gert Jesús að leiðtoga lífs þíns
(Innilegar/Hjartanlegar) hamingjuóskir á fermingardaginn/siðfestudaginn
(Innilegar/Hjartanlegar) hamingjuóskir með daginn
(Innilegar/Hjartanlegar) hamingjuóskir með daginn þinn
(Innilegar/Hjartanlegar) hamingjuóskir með áfangann
(Innilegar/Hjartanlegar) hamingjuóskir með ferminguna/siðfestuna
(Innilegar/Hjartanlegar) hamingjuóskir þennan stóra áfanga
(Innilegar/Hjartanlegar) hamingjuóskir þennan stóra áfanga í lífinu
(Innilegar/Hjartanlegar) hamingjuóskir með þessi merku tímamót

Miðja

Eftir hamingjuóskirnar er gott að koma með einhverja persónulega kveðju til fermingarbarnsins. Hér má auðvitað velja fleiri en einn hlut til að setja í kortið. Það er líka fallegt að skrifa stutt ljóð til fermingarbarnsins eða finna fallegan texta úr Biblíunni, Hávamálum eða öðru trúarriti, eftir því sem við á. Á heimasíðu Ásatrúarfélagsins er hægt að finna kvæði sem gætu verið við hæfi í siðfestukort. Hér eru hugmyndir að alls kyns kveðjum til fermingarbarnsins:

Bjarta framtíð
Bjarta og gæfuríka framtíð
Ég vona að þú eigir [yndislegan/frábæran] dag
Ég óska þér velfarnaðar í framtíðinni
Ég óska þér velfarnaðar um aldur og ævi
Ég óska þér velfarnaðar um ókomna tíð
Ég óska þér gæfuríkrar framtíðar
Guð gefi þér [fallega/bjarta] og [gleðiríka/gæfuríka] framtíð
Lifðu heil/heill
Með ósk um [bjarta/gæfuríka] framtíð
Með von um [bjarta/gæfuríka] framtíð
Megi dagurinn verða þér ógleymanlegur
Megi gleði og gæfa fylgja þér alla tíð
Megi gleði og gæfa fylgja þér um ókomna tíð
Megi gleði og gæfa fylgja þér um aldur og ævi
Megi gleði og gæfa fylgja þér í framtíðinni
Megi gleði og gæfa fylgja þér um alla framtíð
Megi gleði og gæfa fylgja þér og þínum alla tíð
Megi gleði og gæfa fylgja þér og þínum um ókomna tíð
Megi gleði og gæfa fylgja þér og þínum um aldur og ævi
Megi gleði og gæfa fylgja þér og þínum í framtíðinni
Megi gleði og gæfa fylgja þér og þínum um alla framtíð
Megi góður Guð blessa þig og varðveita um alla framtíð
Megi góður Guð blessa þig og varðveita um ókomna tíð
Megi góður Guð blessa þig og varðveita um aldur og ævi
Megi góður Guð blessa þig og varðveita allt tíð
Megi allt ganga þér í haginn í framtíðinni
Megi allt ganga þér í haginn alla tíð
Megi allt ganga þér í haginn um aldur og ævi
Megi allt ganga þér í haginn um alla framtíð
Megi allt ganga þér í haginn um ókomna tíð
Megi lífið leika við þig alla tíð
Megi lífið leika við þig um ókomna tíð
Megi lífið leika við þig um alla framtíð
Megi trúin verða þér hvatning og styrkur á lífsleiðinni
Vonandi áttu [yndislegan/frábæran] dag
Vonandi verður dagurinn jafn [yndislegur/skemmtilegur/frábær] og þú ert
Vonandi verður dagurinn jafn [yndislegur/skemmtilegur/frábær] og þú ert alltaf
Þú getur allt sem þú ætlar þér

Endir

Í lokin þarf að loka afmæliskveðjunni með t.d.:

Bestu kveðjur, [nöfn]
Bestu kveðjur frá [nöfn]
Bestur kveðjur og hamingjuóskir frá [nöfn]
Með kveðju, [nöfn]
Kveðja, [nöfn]
Kær kveðja, [nöfn]
Þín vinkona/þinn vinur/þínir vinir/þínar vinkonur, [nöfn]

Og nafninu þínu/nöfnunum ykkar.

Nú ættir þú að geta sett saman góða kveðju til fermingarbarnsins fyrir fermingarkortið!

Hvað á ég að skrifa í fermingarkort? Read More »

Hvað á ég að skrifa í afmæliskort?

Afmæli, kort, Merkisdagar, Veislur

Hver kannast ekki við það að kaupa kort fyrir afmælið á síðustu stundu og þurfa að finna eitthvað til að skrifa inn í það í flýti? Hvað getur maður eiginlega skrifað í afmæliskort? Hér eru nokkrar tillögur að því.

Eins og með öll skrif er gott að byggja afmæliskort þannig upp að þau hafi upphaf, miðju og endi. Í kortum er þó reyndar best að byrja á ávarpi til þess sem á afmæli, en það er líka hægt að flétta ávarpið inn í upphaf kortsins. Svo tekur við smá texti fyrir miðju kortsins til að gera það persónulegra, jafnvel þótt maður þekki manneskjuna ekki vel, og loks endar maður á einhvers konar kveðju og nafninu sínu. Hér fyrir neðan eru hugmyndir að ávörpum, hvað skrifa má í upphafi, miðjunni og í lokin.

Ávarp

Ávörp eru mis persónuleg og fer það allt eftir því hvernig þú þekkir manneskjuna.

Til elsku…
Elsku…
Kæri/kæra…
Kæri/kæra… minn/mín/mitt
Til…
Elskulega vinkona/elskulegi vinur

Upphaf

Hér eru nokkrar uppástungur til að byrja afmæliskortið. Það er vel hægt að flétta ávarpinu inn í þessar afmælisóskir með því t.d. að segja „Innilega til hamingju með daginn elsku [nafn] mín“.

(Innilega/Hjartanlega) til hamingju með daginn
(Innilega/Hjartanlega) til hamingju með daginn þinn
(Innilega/Hjartanlega) til hamingju með daginn og framtíðina
(Innilega/Hjartanlega) til hamingju með daginn þinn og framtíðina
(Innilega/Hjartanlega) til hamingju með afmælið
(Innilega/Hjartanlega) til hamingju með öll þessi ár
(Innilega/Hjartanlega) til hamingju með [ár]tugsafmælið
(Innilega/Hjartanlega) til hamingju með þennan merkilega dag
[Innilegar/hjartanlegar] hamingjuóskir með afmælisdaginn
[Innilegar/hjartanlegar] hamingjuóskir á þessum merku tímamótum
[Innilegar/hjartanlegar] hamingjuóskir í tilefni dagsins
[Innilegar/hjartanlegar] hamingjuóskir á þessum merka degi
Til lukku með daginn/afmælið
Fyrir [?] árum gerðist sá [merkilegi/frábæri/æðislegi/stórkostlegi] atburður að þú komst í heiminn!
Okkar innilegustu hamingjuóskir [með/á] afmælisdaginn
Okkar innilegustu hamingjuóskir á þessum merku tímamótum
Okkar innilegustu hamingjuóskir í tilefni dagsins
Okkar innilegustu hamingjuóskir á þessum merkis degi
Bestu óskir í tilefni dagsins
Bestu óskir á afmælisdaginn þinn
Til hamingju, þú ert [ár} ára ung/ungur/ungt í dag!

Miðja

Eftir hamingjuóskirnar er gott að koma með einhverja persónulega kveðju til afmælisbarnsins. Hér má auðvitað velja fleiri en einn hlut til að setja í kortið. Það er líka fallegt að skrifa stutt ljóð til afmælisbarnsins. En hér eru hugmyndir að alls kyns kveðjum til afmælisbarnsins:

Afmælisdagar eru góðir fyrir þig, því fleiri sem þú átt, því lengur lifirðu
Allir vilja lifa lengi en enginn vill verða gamall
Allt er fertugum fært
[Ár] ára, síung(ur) og [glæsileg(ur)/stórkostleg(ur)]
[Einlægar/Innilegar] þakkir fyrir samverustundir fyrr og síðar
Ég óska/við óskum þér gleði og gæfu alla þína daga
Ég vona að þú eigir [yndislegan/frábæran/æðislegan] afmælisdag
Ég vona að þú hafir það sem allra best
Ég vona að þú lifir vel og lengi
Ég vona að þú njótir dagsins
Ég þakka einstaka vináttu
Ég þakka frábær kynni

Gleymdu ekki góðum vin,

þótt gefist aðrir nýir.

Þeir eru eins og skúrskin,

skammvinnir en hlýir.

Leiki við þig lán og gengi

lifðu bæði vel og lengi.

Þig er ávallt yndi að muna,

ástarþökk fyrir samveruna.

Gæfan fylgi þér
Gæfan fylgi þér um alla tíð
Gæfan fylgi þér um ókomna tíð
Gæfan fylgi þér um aldur og ævi
Gæfan fylgi þér um alla framtíð
Hafðu það sem allra best
Haltu áfram að vera svona [vinaleg/sæt/frábær/æðisleg/yndisleg] eins og þú ert
Hamingjan þér hangi um háls en hengi þig þó ekki
Hrukkurnar eiga bara að sýna hvar áður var bros
Lánið leiki við þig
Lifðu heil/heill/heilt
Lifðu í lukku en ekki í krukku
Lífið er eins og konfektkassi, bragðast eins og pappír en myndin á lokinu er falleg
Megi dagurinn verða þér ógleymanlegur
Megi gleði og gæfa fylgja þér um alla tíð
Megi gleði og gæfa fylgja þér um ókomna tíð
Megi gleði og gæfa fylgja þér um aldur og ævi
Megi gleði og gæfa fylgja þér um alla framtíð
Megi gæfan fylgja þér um ókomna tíð
Megi gæfan fylgja þér um aldur og ævi
Megi gæfan fylgja þér alla tíð
Megi gæfan fylgja þér um alla framtíð
Megi lánið leika við þig
Megi næstu 50 ár verða enn betri en þau fyrri
Megi næstu áratugir verða þér yndislegir í alla staði
Megir þú njóta lífsins vel og lengi
,,Miðaldra ertu þegar þú hefur hitt svo margt fólk að allir sem þú hittir í fyrsta skipti minna þig á einhvern annan” – Ogden Nash
Njóttu dagsins (í ræmur/vel)
Takk fyrir að vera hluti af lífi mínu
Teldu líf þitt í brosum, ekki tárum. Teldu aldur þinn í vinum, ekki árum.
,,Við erum alltaf á sama aldri innra með okkur” – Gertrude Stein
Vonandi áttu [yndislegan/frábæran/æðislegan] afmælisdag
Vonandi verður dagurinn jafn [yndislegur/frábær/skemmtilegur] og þú ert
Vonandi verður dagurinn jafn [yndislegur/frábær/skemmtilegur] og þú ert alltaf
Það sem [ár]tugur getur gerir [ár]tugur betur
Það skiptir ekki mestu máli að bæta árum við líf sitt, heldur hitt, að bæta lífi við ár sín
Þakka þér fyrir [ljúfa/góða/frábæra/yndislega] vináttu í gegnum árin
Þakka þér fyrir öll góðu samskiptin í gegnum árin
Þegar upp er staðið eru það ekki árin í lífi þínu sem skipta máli heldur lífið í árunum
Þú ert eins og vín… batnar með bara með aldrinum

Endir

Í lokin þarf að loka afmæliskveðjunni með t.d.:

Bestu kveðjur, [nöfn]
Bestu kveðjur frá [nöfn]
Bestur kveðjur og afmælisóskir frá [nöfn]
Með kveðju, [nöfn]
Megi partýið [byrja/hefjast]
Kveðja, [nöfn]
Kær kveðja, [nöfn]
Þín vinkona/þinn vinur/þínir vinir/þínar vinkonur, [nöfn]

Og nafninu þínu/nöfnunum ykkar.

Nú getur þú sett saman þína eigin persónulegu og flottu afmæliskveðjur fyrir afmæliskortið!

Í lokin er hér svo mjög skemmtileg síða um afmælisdaga. Hægt er að slá inn afmælisdegi afmælisbarnsins og fá upp alls konar skemmtilegar staðreyndir um aldur þess: https://you.regettingold.com/. Sumt gæti alveg verið gaman að setja í afmæliskort hjá nánum vini eða vinkonu til að stríða þeim.

Hvað á ég að skrifa í afmæliskort? Read More »